Dövlət dəstəyi ilə Kənd təsərrufatı texnikalarının lizinqlə satışı

Azərbaycanda Avropanın ən böyük heyvandarlıq ferması yaradılır

Azərbaycanda Avropanın ən böyük heyvandarlıq ferması yaradılır
Ağcəbədi rayonunda fəaliyyət göstərən Atena Süd Emalı Zavodunun emal gücünə cavab vermək üçün zavodun yaxınlığında 9200 baş heyvanın olacağı ferma yaradılır.
Bunu “Marja”ya “Aqat Aqro” MMC-nin baş direktoru Alp Parmaksızoğlu deyib.
Onun sözlərinə, görə, bir sıra keçmiş sovet ölkələrini və Türkiyəni çıxmaq şərtilə, Avropada belə bir böyüklükdə hayvandarlıq ferması yoxdur.
“Ferma gündəlik ən azı 100 ton süd istehsal etmək üçün planlaşdırılmışdır. Tikinti işlərinə 2011-ci ilin iyul ayında başlanılıb və ilk “Holstein” cinsindən olan düələr həmin ilin dekabrda gətirilib. Layihənin 3 ildə, iki etapda tamamlanması planlaşdırılır. Nəticədə 9200 baş heyvanın saxlanılacağı bir ferma olacaqdır ki, Avropada belə bir ferma yoxdur”,- Parmaksızoğlu söyləyib.
O qeyd edib ki, hazırda fermada 2502 baş heyvan vardır, o cümlədən 1147 başı sağılan, qalanları isə qısır inəklər, düə, buzov və danalardır.
Heyvanlar “Aqrolizinq” xəttilə alınıb.
Fermanın baş direktoru qeyd edib ki, məhsuldarlıq və südün keyfiyyəti çox yüksəkdir:
“Bu gün etibarı ilə birinci lakatsiyada (birinci doğum ili) hər bir heyvandan günlük orta hesabla 22 litr süd sağılır. Südün yağlılığı 4,16%-dir. Bu çox ciddi bir rəqəmdir, orta Azərbaycan göstəricisindən yüksəkdir. Südümüzün quru maddəsi isə 13,5 faizdir”.
“Azərbaycanda toplanan südün bir milli qramında 3 milyondan artıq bakteriya mövcuddur. Avropada qəbul edilmiş limit isə 100 mindir. Bizim buradakı hədəfimiz 10 min, yəni Avropa standartının altındadır”,- Parmaksızoğlu vurğulayıb.
Alp Parmaksızoğlu bildirib ki, fermada ABŞ sistemi tətbiq edilib. Heyvanlara verilən yemin 65%-ni qarğıdalı silosu, 35%-ni isə yonca təşkil edir:
“Qarğıdalı silosu südün məhsuldarlığı və keyfiyyəti üçün çox önəmlidir. Yonca da heyvanın digər ehtiyaclarını tamamlayan qidadır”.
Fermada inəklər elektron nəzarət altında, eyni anda 40 inəyi sağmağa imkan verən sağım otağında sağılırlar. Ən maraqlısı, heyvanlar “İnək konfortu” metodu ilə saxlanılır və sağıma göndərilir:
“Bir heyvanı çomaq ilə qovaraq sağım otağına salınması zamanı süd verimi ilə, əzizləyərək içəri göndərilməsinin süd verimi ciddi şəkildə fərqlənir. Yəni, heyvanları bu qədər diqqətli və doğru bəsləməyimiz lazımdır. Bunu bütün işçilərə öyrədirik. Burada inəyə təpik atan işçini dərhal qapının önünə qoyuruq”,- Alp Parmaksızoğlu bildirib.
Qeyd edək ki, hazırda “Aqat Aqro” MMC “Atena” MMC-yə gündəlik təxminən 23 ton süd təhvil verir. Qarşıdakı iki il ərzində zavoda təhvil veriləcək südün həcminin isə 100 tona çatdırılması nəzərdə tutulur. Atena Süd Emalı Zavodu gündə 400 ton südü emal etmək gücündədir. Bu gün zavodun istehsal gücünün yalnız 10 fazi həcmindən istifadə olunur, yəni gündə 40 ton süd emal edilir.